بعد العيد : تغير خريطة سيما علي بابا واكس لارج بعد اقبال الجمهور
اضطرت عدد من شركات الإنتاج والتوزيع إنها تزود عدد حفلات أفلام معينة اتعرضت في العيد في دور العرض وده بعد الإقبال القوي عليها من أول يوم عرض ليها، فمثلا الإقبال علي فيلم "سيما علي بابا" لأحمد مكي كبير خلي المسئولين علي التوزيع يزودوا عدد حفلات عرض الفيلم من 6 حفلات لـ 7 حفلات ده غير انهم ضافوا كمان حفلة السوبر ميد نايت والفيلم بيتعرض في 85 دار عرض بعد ما بدأ عرضه في 74 دار عرض.وده لان الشباك التذاكر بتاع الفيلم في كل السينمات مرفوع عليه يافطة " كامل العدد" ونفس الموضوع بالنسبة لفيلم " إكس لارج " لأحمد حلمي اللي زادت عدد حفلات عرضه وعملوا حفلة سوبر ميد نايت كمان بعد زيادة الطلب عليه فبيتعرض دلوقتي في 85 دار عرض.
اما فيلم " كف القمر" للمخرج يوسف وفيلم " امن دولت " لحمادة هلال متمش زيادة عدد الحفلات وبيتعرض بس في 60 دار عرض، وكان منتجين الفيلم فكروا في إنهم يزودوا عدد الحفلات إلا إنهم تراجعوا بسبب تراجع الاقبال عليهم لحد ما.
وبكده رجعت حفلات منتصف الليل مرة تاني بقوة بعد ما قعدت فترة طويلة ملغية بسبب حالة الامن والانفلات الموجود في الشوارع اللي كان بيخلي الناس تقفل بدري وتروح بيوتها بدري .. فهل هتدوم الحفلات دي وتستمر ولا هتقفل بعد نهاية اجازة العيد؟
0 التعليقات:
إرسال تعليق